أكيد معظمنا عرف إن بكرة الحد ( 6 / 4 / 2008 ) فيه إضراب عام ، صح ؟
وطلع علينا حبة شباب قعدوا يزعقوا بأعلى صوت
يا نااااااااااااااس ياهوووووووووووووه لا يجوز
بس أنا عندي رأي تاني ( يجوز يا مشايخ بالعكس ده واجب كمان )
متقلبش عينك وتنكفي على الكي بورد تحضرلي رد صاروخي اقرا للآخر بس
ليه ديمن احنا ف كل حاجة مخالفة الناس تعملها مبنعملش غير إن إحنا نتكلم !!
لحد ما الناس عرفت إن ( الإخوة السنيين ) بيشربو الكسل عالريق
ناس كتير منا إلا من رحم يطلع للناس : حرام يا عالم بطلو جهل بأه
طيب متطلع تقولهم : أيها الأحبة لم يشرع الله لنا كذا والأفضل أن نفعل كذا وكذا ..
وشوف الفرق وشوف الناس بعد كلامك هتعمل معاك إيه
( الله يكرمك يا سيدنا الشيخ - هو ده الكلام - الله يباركلك يا رب - الله يفتح عليك )
وعلى فكرة أنا هشترك في الإضراب واللي عندو مانع
مع احترامي ليه : يروح يشرب من البحر
أنا هشترك في الإضراب عن المعاصي على أد مقدر
أنا هعمل إضراب عن الكسل والتقاعس عن خدمة دين الله
هعمل إضراب عن السلبية وأسعى لنفع أهلي واللي حواليا
هعمل إضراب عن كتر الكلام والتهريج وأعرف دوري في مجتمعي بجد
هعمل إضراب إني أسيء الظن بصحابي وإخواتي وأحسن بيهم الظن ديمن
هعمل إضراب عن إني أعمل فيها أبو العريف والمفتي اللي هنا وهناك
هعمل إضراب عن إني ألف في المنتدى والنت عالفاضي والمليان وأسيب طلب العلم ومراجعة القرآن
إيه ؟ هو انتا كمان مش هتعمل معايا إضراب ؟
قولها ومش لازم تكتبها عشان ميطلعش علينا كتيبة من الإخوة اللي بالك فيهم
ويقولك بدعة ، قال طالب النجاة قال ؟ النجاة في الاتباع يا عم !
وحد قال غير كده يرحمك الله ؟
كمان لما الأستاذ عمرو خالد عمل حملة ( حماية ) كلنا عارضناه
جايب فنانين يا عمرو ؟ وكمان لعيبة كورة ؟
إيدي في إيديكي !! كمان ؟
الله يهديك يا عمرو
طيب ليه احنا منعملش حملة زيها إن صح التعبير ويكون المشتركين فيها مشايخ وعلماء ؟
طبعًا هتقولي ( على رأي المثل ) : لما تشوف حلمة ودنك !
انتا عاوز تحبسنا يا عم ؟
يا جماعة هيا الحملة لازم تكون جماعية ؟ لا طبعًا
ممكن كل شيخ يتكلم عن الموضوع وشوفو احنا عندنا كام قناة فضائية سنية
ممكن كل واحد فينا يعرف واحد مدمن ولا اتنين ينصحهم في الله
ممكن لو حد فينا ليه في الجرافيكس يعمل بوستر ويتبرع بيه لدار طبع وتوزيع
ممكن وممكن وممكن .. بس احنا نتحرك ،
ولا إيه رأيكم ؟
يارب تكون الفكرة وصلت أصلي بكتب على أد حالي ومش عارف أكون عرفت أوصلها ولا لأ ؟
سبحانك اللهم ربنا وبحمدك أشهد ألا إله أنت
أستغفرك وأتوب إليك
