( أنا سلفي وبتعلم لا بجاهد ولا بتكلم )
.
.
سمعت كتير أوي الكلمة دي ، وكنت لما بسمعها الأول كنت بموت من الضحك
إنما بعد كده قعدت أفكر فيها شويه لقيته كلام خطيييييييييييييييييير جدًا
أول حاجة عشان أقول أنا ( سلفي ) دي كلمة مش سهلة زي ما معظمنا فاكر !!
عارف يعني إيه ( سلفي ) ؟؟؟
السلفي ده إنسان غير عادي ، إنسان في كل حركاته وسكناته بيعيش على منهج النبي محمد
السلفي ده إعتقاده إعتقاد الصحابة رضوان الله عليهم !!
السلفي ده نسمة كل الناس بتضرب بيه المثل ، مش لما حد يجيب سيرته يقلبو وشهم
ويقولو : متفتكر لنا حاجة عدلة ، ده يا عم عمري مشوفته بيضحك
شكل السنان عورة عند الشيوخ !!
وخد من النوعية دي كتير جدًا ، غير في المعاملات المادية والأخلاقية
إلا من رحم الله
فعشان أنا أقول على نفسي ( سلفي ) لازم اكون متبع منهج أهل السنة والجماعة والسلف الصالح
حذو القذة بالقذة ، في العقيدة والأخلاق والسلوك ..
مش كده ولا إيه ؟
نيجي بأه لحتة ( وبتعلم ) !!
انتا لو بتتعلم بجد والعلم ده بينفعك كان هيبان عليك
عشان كل إناء ينضح بما فيه ، مش معنى إنك بتتعلم إنك ماسك منار السبيل وراح جاي بيه
رايح فين يا شيخ : رايح درس الفقه
جاي منين يا شيخ : كنت في درس الفقه
اقف مع نفسك وقفة وشوف العلم اللي انتا آعد بتاخده ده بينفعك ولا وبال عليك
الموضوع مش بـ الكم حضرتك !!!
يعني لو احنا من يوم ما التزمنا شوف سمعنا كام حديث وآية في خطب الجمعة بس !!!
لو طبقنا كل جمعة اللي الشيخ بيقولو عالمنبر كان زمانا حاجة تانية خالص دلوقت !!
ولا إيه رأيك ؟
وكمان شوف انتا حضرت كام درس لمشايخنا وسمعت كام محاضرة وحضرت كام دورة !
هل بتزاكر اللي انتا بتاخده .. ولا بتركن كل درس جنب اللي قبله ؟
اقف وراجع نفسك الله يخليك !
وصلنا بأه لأخطر حتتين في الكلام ده كله ( لا بجاهد ولا بتكلم )
أول حاجة لازم تفرق بين أنواع الجهاد
يعني فيه جهاد طلب وجهاد دفع واللي أصعب منهم " جهاد النفس "
ولما تيجي تجاهد شوف انتا هتجاهد مين ؟
يعني مش تيجي لواحد من الذميين مثلا وتمسكو تفقعو علقة وتقوللي ده كافر
زي ما حصل مع عمي وهو محامي ، جاتله قضية لأخ من الجماعات الجهادية ربنا يهديهم !!
الأخ راح هو واحد صاحبه اشترو مطوة وراحو على رئيسهم في الشغل وكان نصراني
راحوله البيت وقتلوه وأخدو الفلوس اللي معاه وكانو 80 جنيه
عمي بيسألو : عملت كده ليه يابني ؟
رد بكل ثقة : بنلم الجزية عشان الحكومة مش بتلمها !!!
هل ده من ديننا في شيء ؟
ما أظنش !!!
كمان لما تيجي لمسلم مش بيصلي وده مش وقت تفصيل في حكم تارك الصلاة
أعرف ناس صحابي لو عدا على تارك للصلاة يقوله ( ربنا يلعنك )
أسأله : ليه كده كذلك كنتم من قبل فمن الله عليكم
يرد : تارك الصلاة كافر وهو تارك للصلاة
ولو الاتنين وقعو مع بعض في مشكلة الأخ صاحبي يبهدل التاني ضرب ويقوللي كافر !!!
واللي بيقول لا بجاهد ولا بتكلم ده بيبقى خايف من الحكومة !!
فنرد عليه احنا مش بنقول ضد الجماعات الجهادية عشان خايفين !!
لأ يا أخي ، احنا بنقول الحق واللي ربنا أمرنا بيه
فشوف يعني جهاد ؟ ومين اللي هتجاهدو زي الشرع ما قال
ولا إيه رأيكم ؟
( ولا بتكلم ) ودي أكبر علامة على سلبية كتير من الإخوة إلا من رحم الله
يا أخي الحبيب ! لازم تعرف إن الكلام ده هو اللي باقي لنا من حديث الأمر بالمعروف
" من رأى منكم منكرًا .. " الحديث
فطبعًا تغيير المنكر باليد ده بضوابط مش وقت ذكرها
وتغيير المنكر بالقلب ده بأه صعب شوية علينا إلا من رحم برضو
لأن القلوب بين أصبعين من أصابع الرحمن يقلبها كيف يشاء !!
وانتا لما تتكلم وتغير المنكر بلسانك هيبقى دافع إيماني ليك بطريقة أكبر
يعني مش هتقول لسواق الميكروباص : لو سمحت يا سطى ممكن تطفي الأغاني
وتقعد ساند راسك على القزاز تندندن بأغنية لأم كلسون على رأي واحد صاحبي
وانا مجرب والله إني لما بغير المنكر بلساني بحس إن إيمانياتي بقت فوق خالص
يا جماعة مش عاوزين نيقى زي أصحاب السبت والعياذ بالله
عاوزين نكون إيجابيين وبنأثر في اللي حوالينا بسمتنا وأخلاقنا وكلامنا الجميل ده
عاوزين نغير بس لما نتغير الأول
" إن الله لا يغير ما بقوم حتى يغيروا ما بأنفسهم "
كل الكلام ده أنا بوجهه لنفسي قبلكم عشان محدش يفتكر إني بتفزلك ولا حاجة !
يا رب تكون فكرتي البسيطة وصلت !!
ويكون ربنا وفقني في عرضها !!
